Sekretari i Përgjithshëm i NATO-s, Jens Stoltenberg, theksoi rëndësinë e “mbajtjes së aeroportit të Kabulit të hapur” për të vazhduar evakuimet.

Në samitin virtual të grupit G7 Stoltenberg tha se “disa qindra pjesëtarë të stafit dhe kontraktorë të NATO-s kanë ofruar shërbime kritike, të tilla si kontrolli i trafikut ajror, furnizimi me karburant dhe komunikimet në aeroport”.

Ai theksoi “rolin koordinues” të NATO-s në evakuimin e njerëzve në mënyrë sa më efektive.

“Ishte e rëndësishme që përparimet e bëra nga populli afgan në 20 vitet e fundit me mbështetjen e konsiderueshme të të gjithë bashkësisë ndërkombëtare të ruhen”, citohet të ketë thënë ai në një kumtesë të NATO-s.

Duke kujtuar prioritetin kryesor të NATO-s për të siguruar që Afganistani të mos bëhet një platformë për “terroristët ndërkombëtarë”, Stoltenberg nënvizoi se nuk ka pasur sulme terroriste ndaj aleatëve të NATO-s të organizuar nga Afganistani që nga sulmet terroriste të 11 shtatorit 2001 në SHBA,transmeton Anadolu Agency (AA).

Aleatët e NATO-s do të vazhdojnë të luftojnë terrorizmin ndërkombëtar dhe të sigurojnë që Afganistani të mos bëhet përsëri një strehë për grupet terroriste, tha ai, duke shtuar se kërcënimi terrorist mund të rishfaqet.